木瓜杏仁魚尾湯

<<煲出回憶的味道 - 木瓜杏仁魚尾湯>>


除左薯仔蕃茄湯之外.......其實我唔識煲湯

我都知好易,但係有時又唔知d湯有咩功效,所以一直都無煲

最近買左一本靚湯王,有過千款湯水@_@好啱我 • ̮• 

 

因為大爺最近咳,咳左好多日,睇怕仲有排咳~(百日咳呀陰公~)

書中有寫功效 : 健脾和中,潤肺止咳,啱晒我地喎....

睇左廿幾頁之後,就決定煲哩個<<木瓜杏仁魚尾湯>>貪佢材料夠簡單唔複雜

 

 

鯇魚尾$15

木瓜一份$10/4個
(用左3個,要熟D,煲出嚟甜D)

南北杏 已經有

薑 數片

見仲有一朵雪耳,就加埋一齊煲

先煎香魚尾,水滾後放入所有材料一齊煲

滾後轉文火煲2.5小時,落鹽調味即可

 

老公睇一眼見到哩個湯就話 : 哩個湯潤肺喎~

我 : 你又知?

大爺 : 我呀公以前成日煲架....

我 : 你飲下,味道似唔似~

大爺 : 好好味呀~好清甜....(不斷一口接一口...飲• ̮• )

平時唔好湯既人竟然係咁飲係咁飲....佢真係好鐘意這種味道

眼前的湯和味道,好似將大爺帶回和公公昔日相處的時光

我誤打誤撞....煲出回憶的味道,我好開心呀~

♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥

大爺細細個和公公婆婆一齊住,食呀公d餸大~

雖然呀公已經去仙遊,但係大爺腦海還記得好清楚

記得呀公的手勢,記得呀公留下的食物味道,也包涵好多溫情

哩種味道是回憶,味道能另你想念一個人,是一件幸福的事....

 

♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥

隔天....剩下的湯我加了米粉,一樣咁好味

我都愛上這個味道....

 

 

之前書局全線85折,我打書釘打左幾日...

諗清諗楚....最後買左哩4本書• ̮•

有85折我先買架,唔洗去書展迫餐懵....

 

*完*